| | |

Vel heppnað málþing um Sjókvíaeldi í Ísafjarðardjúpi

Frá Málþinginu á Ísafirði
Frá Málþinginu á Ísafirði

Þann 10.maí 2016 stóð Landsamband Fiskeldisstöðva fyrir málþingi um sjókvíaeldi í Ísafjarðardjúpi. Þingið var haldið í stjórnsýsluhúsinu á Ísafirði og mættu um 120 á fundinn.

Á fundin voru erindi frá sjö fyrirlesurum um stöðu fiskeldis á Íslandi og fyrirhuguð áform um fiskeldi í Ísafjarðardjúpi.

Góðar og málefnalega umræður fóru fram um hvert erindi og var gerður góður rómur að framtakinu.

Hægt er að skoða fyrirlestra málþingsins hér á heimasíðu Atvest:

http://atvest.is/malthing_um_sjokviaeldi_i_isafjardardjupi/

 

Nýsköpunarnámskeið Grunnskólana á Sunnanverðum Vestfjörðum

Vinningshafarnir frá Sunnanverðum Vestfjörðum
Vinningshafarnir frá Sunnanverðum Vestfjörðum

Þann 26.-27. apríl sl. var haldin nýsköpunarnámskeið grunnskólana á Sunnanverðum Vestfjörðum á Patreksfirði. Nemendur í 8, 9 og 10. bekk frá Grunnskólanum á Tálknafirði og Grunnskólum Vesturbyggðar tóku þátt í námskeiðinu.

Námskeiðið stóð yfir í tvo daga og héldu starfsmenn Atvinnuþróunarfélagsins á Vestfjörðum utanum námskeiðið og voru nemendum innan handar við handleiðslu ásamt því að halda fyrirlestra um markaðsmál og gerð fjárhagsáætlana.

Markmiðið var að nemendur myndu fullvinna viðskiptahugmynd á námskeiðinu og útbúa kynningu sem hópurinn mundi kynna fyrir dómnefnd í lok námskeiðsins. Dómnefndin valdi þrjár bestu nýsköpunarhugmyndirnar. 

Á námskeiðinu komu fram margar afar áhugaverðar nýsköpunarhugmyndir og var fjölbreytni þeirra mikil.

Í fyrsta sæti var hugmyndin 'Home Locator' sem er staðsetningarborði ásamt 'Appi' sem hægt er að nota til að fylgjast með öllum þínum persónulegu munum, allt frá lyklum til barna. 

Í öðru sæti var verkefnið 'Þaratrefjar' þar sem viðfangsefnið var að vinna trefjar úr þara sem kæmi í stað trefja sem í dag eru unnar úr trjám.

Í þriðja sæti var 'Double Tube' sem er nýstárlegt verkfæri sem auðveldar alla vinnu í eldhúsinu.

 

Ert þú frumkvöðlakona?

Ert þú frumkvöðlakona?

Vinnumálastofnun stýrir Evrópuverkefninu FREE  - Female Rural Enterprise Empowerment en verkefnið hefur fengið 40 milljónir í styrk úr Erasmus+ áætlun Evrópusambandsins. Samstarfsaðilar í verkefninu eru sjö talsins og koma frá Bretlandi, Króatíu, Búlgaríu og Litháen en auk Vinnumálastofnunar á Íslandi tekur Byggðastofnun þátt í verkefninu.

FREE verkefnið hefur það markmið að efla hæfni frumkvöðlakvenna á landsbyggðinni.

Boðið verður upp á fræðslu í viðskiptatengdum þáttum í fjarkennslu, en einnig verður lögð áhersla á að byggja upp persónulega færni með því að bjóða upp á þátttöku í þjálfunarhringjum (Enterprise circles). Nýjar leiðir verða nýttar til að ná til þátttakenda sem búa í dreifbýli til að tryggja aðgengi þeirra að fræðslu og tengslaneti en það er einnig hlutverk verkefnisins að þróa tengslanet sem konur geta nýtt sér til stuðnings og lært af. Fyrsti verkþáttur FREE verkefnisins er að leita til kvenna til að taka þátt í rýnihópaumræðum um stöðu frumkvöðlakvenna á landsbyggðinni. Með þessari aðferð verður til ný þekking sem getur varpað skýrari ljósi á aðstæður frumkvöðlakvenna í viðkomandi löndum.

Nú leitum við að konum á Vestfjörðum, Norðurlandi vestra og Austurlandi til að taka þátt í umræðum sem mun fara fram um miðjan janúar næstkomandi.

Leitað er eftir konum sem eru:

  • eigendur að nýstofnuðu fyrirtæki eða
  • með viðskiptahugmynd sem þær vilja koma í framkvæmd

Markmiðið er að safna upplýsingum um stöðu og þarfir frumkvöðlakvenna og þróa nýjar leiðir til þess að efla enn frekar atvinnusköpun sem getur styrkt efnahagslega og félagslega stöðu kvenna á dreifbýlum svæðum. Umræður í hópunum mun fara fram á íslensku.

Ef þú hefur áhuga á því að taka þátt í að móta nýjar hugmyndir með okkur þá vinsamlegast sendu tölvupóst með eftirfarandi upplýsingum fyrir 6.janúar nk.

 

Nafn fyrirtækis/viðskiptahugmyndar:

Nafn umsækjanda:

Símanúmer /GSM

Heimili:

Kennitala:

Netfang:

Stutt lýsing á starfsemi eða lýsing á viðskiptahugmynd.

 

 

Ef fyrirtæki hefur verið stofnað hve lengi  hefur það verið í rekstri?

 

Vefsíða fyrirtækis – slóð (ef hún er til)

Hvers vegna hefur þú áhuga á þátttöku?

 

 

 

 

Íslandsstofa boðar til fundar á Ísafirði með framleiðendum og útflytjendum matvæla

Íslandsstofa boðar til fundar á Ísafirði með framleiðendum og útflytjendum matvæla og öðrum þeim sem áhuga hafa á málefninu fimmtudaginn 12. nóvember kl. 10:30-12:00 Háskólasetri Vestfjarða á Ísafirði.

Á fundinum verða kynntar niðurstöður kortlagningar matvælageirans sem Íslandsstofa lét gera í samstarfi við hagsmunafélög í framleiðslu matvæla og rætt um matvælaframleiðslu á Vestfjörðum. Kortlagningin fólst í spurningakönnun sem Gallup lagði fyrir matvælafyrirtækin í landinu og viðtölum við útflytjendur og hagsmunaaðila.

Fulltrúar matvælaframleiðenda á Vestfjörðum eru hvattir til að mæta og taka virkan þátt í umræðum um tækifæri og framtíðarsýn fyrir sitt svæði og hvernig Íslandsstofa getur sem best stutt við matvælaframleiðendur og útflytjendur matvæla á Vestfjörðum.

Nánari upplýsingar um fundinn veita:
Bryndís Eiríksdóttir, bryndis@islandsstofa.is og
Áslaug Þ. Guðjónsdóttir, aslaug@islandsstofa.is, verkefnisstjórar á matvælasviði, í síma 511 4000.

Fundurinn er öllum opinn en nauðsynlegt er að skrá þátttöku fyrirfram á vef Íslandsstofu.

Nýr starfsmaður AtVest á Ströndum og Reykhólum

María Hildur Maack hefur hafið störf að hluta fyrir Atvinnuþróunarfélag Vestfjarða. Hún mun hafa aðsetur á hreppsskrifstofu á Reykhólum á þriðjudögum, fimmtudögum og föstudögum (8-16, frá og með 1. september) en að jafnaði á Hólmavík á mánu- og miðvikudögum (9-17 frá sama tíma).  Hægt er að hafa samband við Maríu nú þegar um verkefni í gegnum mmaaria@atvest.is . María hleypur í skarðið fyrir verkefnisstjóra félagsins hana  Viktoríu, sem stefnir á frekara nám.

María hefur starfað við rannsóknir, verkefnastjórnun og almannatengsl fyrir Íslenska NýOrku. Einnig á hún að baki langa sögu í þróunarverkefnum í ferðaþjónustu og umhverfismálum. María hefur MS próf í umhverfisstjórnun frá IIIEE í Lundarháskóla og BSc í líffræði frá Háskóla Íslands og í Gautaborg með áherslu á sjávarvistfræði. Að auki er hún að leggja lokahönd á doktorsverkefni í visthagfræði um heildaráhrif þess að nota rafmagn og vetni í íslenskum landsamgöngum í stað olíu. María hefur reynslu af verkefnastjórnun bæði í alþjóðlegum samskiptum og á Íslandi. Hún hefur kennt á öllum skólastigum og verið leiðsögumaður um Ísland á sumrum, enda mikil tungumálamanneskja. Hún býr nú á Reykhólum.