| | |

Nýtt styrkjakerfi og stóraukin framlög

Náttúrafurð breytt í verðmæti
Náttúrafurð breytt í verðmæti

Tækniþróunarsjóði RANNÍS / Atvinnu og Nýsköpunarráðuneytis hefur verið umbylt. Nú geta nýsköpunarfyrirtæki sótt um misháa styrki eftir því hvar í þróunarferli fyrirtækin eru stödd. Þannig er fyrst hægt að fá styrk til grunn- eða hagnýtra rannsókna. Ef vel gengur er hægt að sækja um til vöruþróunar sem að sjálfsögðu er einnig til að þróa hugmynd um þjónustu. Þegar fyrirtæki vill síðan taka svifflug og stækka umsvif er hægt að sækja um framlag úr Vexti  gegn því að inn komi jafnhátt framlag sem hlutafé. Einnig er hægt að sækja sérstaklega um styrk til markaðssetningar á vöru sem hefur sannað sig. Þetta er breyting sem margir hafa beðið eftir. Nú er frumkvöðlum sem komnir eru mislangt með hugmynd sína gefinn kostur á að keppa við aðra sem eru í svipaðri stöðu og færa sig áfram upp þroskastigann.

Atvinnuþróunarfulltrúar geta veitt aðstoð við að sækja um í þessa sjóði, en það er langbest að vera búin/n að setja niður á blað öll helstu atriði viðskiptaáætlunar og fastmótaðar hugmyndir um samstarfsaðila. Vefgáttin Island.is er notuð til að fylla út umsóknir og þess vegna er kostur að þekkja það vef-umhverfi og eiga íslykil eða auðkenni í síma. Þó er gefinn kostur á að annar en frumkvöðullinn eða nýsköpunarfyrirtækið sæki um. Einnig er sá kostur í boði að nýta hluta upphæðinnar í verkefnastjórnun. Það getur komið sér vel í skýrsluskilum og umsjón allt eftir því hvar frumkvöðullin sækist eftir að einbeita sér.

Næsti umsóknafrestur er kl 16 þann 15. september í flesta sjóði. Þeir sem eru á algjöru byrjunarstigi verða þó að hinkra þar til 3. apríl 2017. Þá er hægt að sækja um 1.500 þúsund í stuðning viðmótun hugmynda. Skoðið síðu Tækniþróunarsjóðs og glærukynningu sem sýnd var á fundi í Þróunarsetrinu á Ísafirði 25.8.2016